แนวกินอีสานบ้านเฮา 100 เมนู
ตอนที่ 14 เมนูที่ 14
ขนมเส้นน้ำยาป่า สูตร แม่ใหญ่นวล
อ้ายต้องขอขอบคุณสำหรับผู้ที่ติดตามอ้ายมาแต่แรกๆ
ขอบคุณที่เข้ามาม่วนและกะเข้าฮ่วมรำลึกถึงอีสานบ้านเฮา
สำหรับคนไกลบ้าน พอได้เห็นแนวอยู่แนวกินบ้านเฮา
กะคือสิอุ่นอกอุ่นใจขึ้นมาแน่จักหน่อยอยู่ แม่นบ่
แต่สำหรับผู้ที่เข้ามาอ่านแล้ว มันบ่ถืกอกถืกใจ กะข้ามไปโลดกะได้เนาะ
อ้ายเข้าใจอยู่ ว่าคนฮักท่อผืนหนังคนชังท่อผืนเสื่อ
ขอให้พื้นที่หม่องนี้เป็นพื้นที่ให้คนที่ฮักกันมาพักผ่อน พบปะเว้ากันแบบอ้ายๆน้องๆสำนั้นกะพอแล้ว
มื้อนี้วันเสาร์ ยามค่ำๆกะคิดอยู่ว่าสิเฮ็ดอีหยังดี
ว่าแล้วกะเลยไปย่างเล่นตลาดกะดีคือกัน
ฮ่าเที่ยพ้ออีหยังเป็นตาเอามาเฮ็ดแนวกินฝากพี่ฝากน้อง
ย่างไปก็ขอเพิ้นถ่ายรูปไป มีความสุขดีคือกันเด้นี่
ป้าด มีทั้งบักขามทั้งบักม่วงเพิ้นกะเอามัดมาขาย
แถมยังมีผักบ้านๆที่อ้ายคุ้นเคยหลายๆอย่าง
จั่งได๋สิอดใจบ่ให้ซื้อได้น่อ
จั่งซี่มันต้องจัดเต็มพะนะ
แนมไปเห็นขนมเส้นพอดิบพอดี แม่ค้าเอาสองโล พอซื้อแล้วกะค่อยย่างไปร้านขายปลา
ปลาข่อหมด แม่ค้าบอก
เอ้า เฮ็ดจังได๋หนอ ขนมเส้นกะซื้อมาแล้ว
เอาปลานิลแทนกะได้ เอามาโตหนึ่ง โตใหญ่ๆเด้อ เฮ็ดให้นำ เอาเครื่องในออก ตัดครึ่งพร้อม
บัดที่นี่กะพร้อมแล้ว สำหรับเมนูที่ 14 ขนมเส้นน้ำยาป่า
แต่ต้องบอกเอาไว้ก่อนเด้ ว่าสูตรของอ้าย บ่คือผู้ได๋
เพราะเป็นสูตรคนอีสานโบราณ
แม่ใหญ่นวลเลาสอนให้อ้ายเฮ็ด
เดี๋ยว อ้ายสิเอามาบอกต่อกะแล้วกันเนาะ เผื่อว่าสิมีคนอยากลองเฮ็ดนำเบิ่ง
อ้ายสิพยายามบอกวิธีเฮ็ดให้มมันลละเอียดที่สุด ท่อที่สิเฮ็ดได้กะแล้วกัน
O k นะคะ เอื้อยแคท อิงลิช เลาถาม
ฟังคำว่า ok กะเลยคึดฮอดนิทานก้อมตอนเป็นเด็กน้อย
แม่ใหญ่นวลเลาไปย่ามลูกสาวที่กรุงเทพ
พอไปฮอด ลูกสาวเลากะมาฮับหน้าปากซอย
แม่ใหญ่นวลเลากะบ่ลืมกะตาหมากเลาเด้
เราได้ยินลูกสาวถามคนขับรถสองแถวว่า
“ถ้าเหมาไปในซอยคิดเท่าไหร่”
“สามสิบ ok ไหมครับ”
“อีสมๆ ok มันแปลว่าอีหยัง”เลาถามลูกสาว ตอนขึ้นมานั่งตอนท้ายรถสองแถวแล้ว
“ok แปลว่าตกลง แม้ อีแม่”ลูกสาวบอก
พอรถสองแถวแล่นไปได้จักหน่อย แม่ใหญ่นวลเราเฮ็ดกะต่าหมากหลุดมือตกลงไป
ย้อนเลาเสียดาย เลากะฟ้าวฮ้องบอกคนขับรถว่า
“ท้าวๆ จอดรถก่อนแน่ กะต่าหมากแม่ok”
555 อ้ายเว้าพื้นแม่ใหญ่นวลให้ฟังม่วนๆเนาะ บ่ต้องเอาไว้คึดหลายดอก
เว้ามาฮอดพี้แล้ว หลายๆคนก็คงสิอยากฮู้ว่าแม่ใหญ่นวลเลาเป็นผู้ได๋ แม่นบ่
แม่ใหญ่นวลเราเป็นอีแม่ของอ้ายเองแหละ
ในคืนเดือนหงาย หลังจากกินเข้าแลงแล้ว เฮามารวมกันนอนเล่นอยู่ตะแคร่ไม้ไผ่ใต้ต้นบักขาม
ที่ตั้งอยู่เดิ่นบ้าน บ่ต้องมีไฟแสงเดือนกะส่องสว่างป่านยาวกลางเว้น แม้
ลมก็พัดเย็นสบาย ยุงกะบ่มี
แม่ใหญ่นวลเลาเว้าเรื่องตอนที่เลายังเป็นสาวให้อ้ายฟังว่า
ตอนเลายังเป็นสาว เลาก็คือผู้จบผู้งามจนส่าไปสามบ้านเจ็ดบ้าน
(อ้ายฮู้แล้วว่าอ้ายเอานิสัยหลงตัวเองมาจากไผ๋)
บ้านเลา(ภายถึงแม่ใหญ่นวลเด้อ) มีนาหลายๆติดกับแม่น้ำมอ
เว้าง่ายๆกะคือรวยกะว่ามาโลด แม่ใหญ่นวลขี้คุยเอ้ย
เลาชื่อว่า นวลสา มีน้องสาวสองคน ชื่อว่า จันทร์เมือง กับ เสถียร
นอกจากมีที่นาหลายๆแล้ว ครอบครัวของแม่ใหญ่นวลยังมีงัวควายเลี้ยงเอาไว้จนเต็มคอก
ก่อนที่สิต้อนควายกลับไปเข้าคอก สาวนวลกับน้องสาวทั้งสองคน
กะสิแวะอาบน้ำที่แม่น้ำมอก่อนเป็นประจำคุมื้อ
แม่น้ำมอนี่เนาะกะสิมีพวกผู้บ่าวผู้สาวแวะมาอาบน้ำกัน กะประมาณว่าเป็นแหล่งพบปะสังสรรค์กัน
คันสิเปรียบกะคือสิเป็นผับเธคแถวอาซีเอคุมื้อนี้ล่ะ
อ้ายเปรียบเทียบเอาเองเด้ แม่ใหญ่นวลเลาบ่ได้บอกเอาไว้ดอก
ก่อนสิลงไปเล่นน้ำมอ สาวนวลกะเอาถ่านไฟฉายตรากบใส่วิทยุก่อน แล้วกะเปิดหมอลำตั้งเอาไว้ตรงฝั่ง
คุมื้อที่เพลงถ่านไฟฉายตรากบดังขึ้นและจบลง กะสิมื้อผู้บ่าวผู้หนึ่งโผล่หน้ามาตลอด
เลาชื่อว่า อ้ายชาย อ้ายชายนี้ถือได้ว่ารูปหล่อหลาย หุ่นสูงใหญ่เพราะว่าเพิ้นเป็นทหารพรานเด้
อ้ายชายนิมักสิถือฆ้องใส่ปลามานำตลอด เพิ้นวางของเอาไว้ใกล้วิทยุสาวนวล
แล้วกะลงมาเล่นน้ำมอ ก่อนสิค่อยๆขยับเข้ามาใกล้
“ผู้สาวขอยืมสบู่ถูแน่ได้บ่”อ้ายชายมุดน้ำขึ้นมาใกล้ๆสาวนวล
“บ่ให้แหลว อยากถูกะไปซื้อเอาเองโลด”ผู้สาวหันหน้าหนี
พยายามสิเอาสบู่นกแก้วใส่ลงไปในขัน แต่ว่าสบู่มันหมื่นแม้ มันกะหล่น จ๋อม ลงไปในน้ำมอ
อ้ายชายกะเลยเฮ็ดโตเป็นพระเอก มุดลงไปงมขึ้นมาให้
“เอาไปโลดข่อยยกให้”สาวนวลฟ้าวขึ้นมาจากน้ำมอ
“อีเมือง อีเถียน ขึ้นมาแม้ สิได้ต้อนควายกลับบ้านกลับเฮือน”ฮ้องเอิ้นน้องสาวแก้เขิน
“เดี๋ยวก่อน”อ้ายชายขึ้นมาจากน้ำ ล้วงไปในฆ้องกำเอาปลาข่อใหญ่ขึ้นมาโตหนึ่ง
ดึงเอาหญ้าขนมาฮ้อยเหงือกส่งให้สาวนวล
“แลกกับสบู่”เพิ้นบอกพร้อมฮอยยิ้มที่คึดว่าหล่อที่สุด สาวนวลกะฮับมาถือ
ขอขอบคุณรูปปลาข่อใหญ่งามๆจากเพจ แดนดินถิ่นมาตุภูมิ
ตอนแรกเห็นอ้ายชายมายืมสบู่ถูคุมื้อๆ กะชังๆ ผู้ชายอีหยัง หน้าด้านหน้าทนคัก มาได้คุมื้อ
จนมื้อนี้สาวนวลกับฮู้สึกว่า อ้ายชายกะเป็นพ่อชายที่ดีผู้หนึ่งคือกันเด้
(แม่ใหญ่นวลมักเขาแล้วแม่นบ่)เลาเล่าไป หน้าของแม่ใหญ่นวลแดงป่านว่าผู้สาวซ่ำน้อย
สรุปว่าปลาข่อใหญ่ตัวนั้น กะเลยกลายมาเป็น น้ำยาขนมเส้นในมื้อแลงนั่นเอง
หลังจากนั้นอ้ายชายกะเอามาปลามาฝากสาวนวลคุมื้อ
ลังเที่ยกะเป็นปลาดุก ปลาขาว ปลาสร้อย คันมื้อได๋ที่เพิ้นได้ปลาข่อใหญ่
เพิ้นจะสิฟ้าวเอามาให้ผู้สาวแทนที่สิเก็บเอาไว้กินเอง
เอ้า!!! มาเข้าเรื่องจักเที่ย สำหรับเมนูหมายเลข 14
อ้ายกะสิขอนำเสนอขนมเส้นน้ำยาปลาร้า สูตรแม่ใหญ่นวล
หรือคนกรุงเทพเพิ้นเอิ้นว่า ขนมจีนน้ำยาป่านั่นล่ะ
มาแนมเบิ่งโลดมามันสิเด็ดเผ็ดจนฮ้องไห้ขนาดได๋
มาเตรียมเครื่องก่อนเด้อ มาเบิ่งว่ามีอีหยังแน่ที่อ้ายที่เอาใส่ลงไป
กระชาย
กระเทียม
หัวผักบั่ว
หัวคิงไค
ขิง
ข่า
ใบบักกูด
บักพริกแห้งใหญ่
บักพริกแห้งน้อย
บักพริกดิบ ใส่สามอัน น้ำยาสิได้สีแดงงามๆปานเลือดพุ่นนะ
ส่วนเนื้อปลา มื้อนี้อ้ายใช้ปลานิล แต่ถ้าใช้ปลาข่อคือแม่ใหญ่นวล
เนื้อปลาสิฟูแซ่บกว่า
ปลาร้า
ปลาทูเค็ม
ลูกชิ้นปลา
กะปิ
เกลือ
น้ำปลา
น้ำตาล
ขาดบ่ได้เด้ ขนมเส้น ซื้อแบบเส้นน้อยๆ มันเข้าเส้นกว่า
บักบั่ว กับ ผักหอมเป เอาไว้โฮยหน้า
ส่วนผักเอาไว้กินน้ำกะมี
ผักก้านจอง
ผักบุ้งไทย
ผักกะหล่ำ
ผักอีตู่
โหระพา
ผักไผ่
สะระแหน่
บักถั่ว
บักแตง
สำคัญสุดโลด ถั่วงอก ขาดบ่ได้เด้
ไข่ไก่ ต้มแล้วกะปอกเปลือกเอาไว้กินคู่กัน
ย่างนำอ้ายเข้ามาในครัวโลดเดี๋ยวสิเอ็ดให้เบิ่งคุขั้นคุตอน
เอาผักทั้งหมดทั้งมวลไปแช่น้ำ ย่อนซื้อเขามาย่านเขาฉีดยากะเลยซื้อ
กระปุกนี้มาแช่ผักเอาไว้ 15 นาที
แล้วค่อยล้างออก 2 น้ำ
เอาบักพริกแห้งแช่น้ำไว้ก่อนเด้อ สิได้ตำง่ายๆ
แล้วกะปอกขิงเอาไว้ท่า
หลังจากนั่นกะเอา หัวผักบั่ว กระเทียม ขิง ข่า กะชาย หัวคิงไคทุบก่อนค่อยหั่น
ยกเว้นบักพริกแห้ง
ตั้งน้ำให้เดือด เอาเครื่องหอมทั้งหมดใส่ลงไปต้มฉีกใบบักกูดลงไปใส่เกลือนำเด้อ
พอเดือดอีกรอบ กะค่อยใส่กะปิ ท่าให้เดือดอีก
เอาปลานิลลงไปต้ม ต้มไปเรื่อยๆจนปลาสุกแล้วค่อยตักปลาขึ้น
แล้วจั่งเอาปลาทูเค็มลงไป อย่าเอาปลาทูเค็มลงไปต้มพร้อมปลานิลเด้อ
ปลาทูเค็มมันเปื่อยเร็ว เดี๋ยวมันสิเปื่อยหมดก่อน
ใส่ปลาทูเค็มลงไปแค่พอสุก กะตักขึ้นมา บ่ต้องต้มโดน
หลังจากนั้นกะตักเครื่องทั้งหมดขึ้นมา น้ำที่ใช้ต้มอย่าเททิ่มเด้ เฮาสิเอาไว้เฮ็ดน้ำหัวน้ำยา
(น้ำหัวกะคือน้ำหลักของน้ำยา)
เอาเครื่องหอมที่ต้มแล้ว ไปตำให้แหลก
พอตำแหลกแล้วกะเอาลงใส่ในน้ำหัว
คั้นให้ความหอมความเผ็ดออกมา คันน้ำมันน้อยกะคั้นหลายๆน้ำกะได้
พอได้น้ำหัวพอตามที่อยากได้แล้ว กะกรองเอากากมันออก เหลือไว้แต่น้ำล้วนๆ
ส่วนกากมันกะเอาทิ่ม
ต่อมากะเอาปลามาแกะเอาแต่เนื้อปลา แกะปลาทูแยกกันเอาไว้
ก่อนเอามาตำรวมกันให้แหลกจนเป็นเนื้อเดียวกัน คันสิให้ดีใช้สากคนวนๆไปรอบๆ เนื้อปลาสิได้ฟูขึ้นอีก
เอากระชายกับหัวบักบั่วที่บุแล้วหั่นเตรียมเอาไว้อีก
พร้อมทั้งต้นผักบั่วกับหอมเป กะเอามาหั่นไว้นำ
เอากระทะมาตั้งไฟ ใส่น้ำหัวที่เฮาเตรียมเอาไว้ใส่ลงไป
ต้มจนน้ำเดือด เอาเนื้อปลาที่ตำแล้วใส่ลงไป
หลังจากนั้น ให้ใส่น้ำปลาร้ากะเอาแล้วแต่ความมักของเฮา
ปรุงรสชาติใส่น้ำปลา น้ำตาล ชิมเบิ่งให้มันนัวๆเด้อ
คนให้มันเข้ากัน ท่าให้มันเดือดอีกจักเทื่อ ค่อยเอาลูกชิ้นปลาใส่ลงไป
แล้ว ปล่อยให้ลูกชิ้นปลาสุก กะเอากะชายกับหัวผักบั่วทุบใส่ลงไป
ต้มต่อไปอีกจักหน่อย ค่อยใส่ผักบั่วกับผักหอมเปหั่น ยกกระทะลงมาตักใส่ถ้วย
เป็นอันเรียบร้อย
พร้อมกิน
เดี๋ยวก่อน ขนมเส้นกะต้องกินกับผักเนาะ
เอาผักมาเตรียมก่อน
ผักบุ้งกับผักคันจอง เอามาหั่นแล้วเอาไปต้ม ต้มสุกกะตักขึ้นมาแช่น้ำ มันสิได้สีงามๆ
ส่วนผักกะหล่ำกะเอามาหั่นบางๆเป็นเส้นๆ
ผักอีตู่ โหระพา ผักไผ่ กับผักสะระแหน่ เอามาเด็ดใส่ถ้วยไว้
สำหรับ บักถั่วกับบักแตงกะเอามาหั่นเป็นต้อนน้อยๆ
ถั่งงอกกะเอาไปล้างก่อน
จัดทั้งหมดลงไปในกระด้งให้มันงามๆ มันจักสิน่าจับมาใส่ปาก
เอาไข่ต้มที่เฮาเตรียมไว้แต่แรก ออกมา
ทีนี่กะจับขนมเส้นใส่จานได้โลด
เมนูนี้ขนมเส้นน้ำยา สูตรแม่ใหญ่นวลกะเสร็จเรียบร้อยหมดทุกขบวนความแล้วน่อ
พออ้ายยกออกมา แม่ใหญ่นวลกับผู้ใหญ่ชายผัวเรากะถึงกลับกลืนน้ำลายลงคอเฮือกใหญ่ๆ
“คือเป็นตาแซ่บแท้ล่ะบักอ้าย”
แนวกินที่เฮ็ดขึ้นจากหัวใจ มันกะต้องแซ่บอยู่แล้วล่ะ โดยเฉพาะแนวกินที่เฮ็ดให้คนที่เฮาฮักและกะฮักเฮาที่สุดกิน
ตอนที่ 14 เมนูที่ 14
ขนมเส้นน้ำยาป่า สูตร แม่ใหญ่นวล
อ้ายต้องขอขอบคุณสำหรับผู้ที่ติดตามอ้ายมาแต่แรกๆ
ขอบคุณที่เข้ามาม่วนและกะเข้าฮ่วมรำลึกถึงอีสานบ้านเฮา
สำหรับคนไกลบ้าน พอได้เห็นแนวอยู่แนวกินบ้านเฮา
กะคือสิอุ่นอกอุ่นใจขึ้นมาแน่จักหน่อยอยู่ แม่นบ่
แต่สำหรับผู้ที่เข้ามาอ่านแล้ว มันบ่ถืกอกถืกใจ กะข้ามไปโลดกะได้เนาะ
อ้ายเข้าใจอยู่ ว่าคนฮักท่อผืนหนังคนชังท่อผืนเสื่อ
ขอให้พื้นที่หม่องนี้เป็นพื้นที่ให้คนที่ฮักกันมาพักผ่อน พบปะเว้ากันแบบอ้ายๆน้องๆสำนั้นกะพอแล้ว
มื้อนี้วันเสาร์ ยามค่ำๆกะคิดอยู่ว่าสิเฮ็ดอีหยังดี
ว่าแล้วกะเลยไปย่างเล่นตลาดกะดีคือกัน
ฮ่าเที่ยพ้ออีหยังเป็นตาเอามาเฮ็ดแนวกินฝากพี่ฝากน้อง
ย่างไปก็ขอเพิ้นถ่ายรูปไป มีความสุขดีคือกันเด้นี่
ป้าด มีทั้งบักขามทั้งบักม่วงเพิ้นกะเอามัดมาขาย
แถมยังมีผักบ้านๆที่อ้ายคุ้นเคยหลายๆอย่าง
จั่งได๋สิอดใจบ่ให้ซื้อได้น่อ
จั่งซี่มันต้องจัดเต็มพะนะ
แนมไปเห็นขนมเส้นพอดิบพอดี แม่ค้าเอาสองโล พอซื้อแล้วกะค่อยย่างไปร้านขายปลา
ปลาข่อหมด แม่ค้าบอก
เอ้า เฮ็ดจังได๋หนอ ขนมเส้นกะซื้อมาแล้ว
เอาปลานิลแทนกะได้ เอามาโตหนึ่ง โตใหญ่ๆเด้อ เฮ็ดให้นำ เอาเครื่องในออก ตัดครึ่งพร้อม
บัดที่นี่กะพร้อมแล้ว สำหรับเมนูที่ 14 ขนมเส้นน้ำยาป่า
แต่ต้องบอกเอาไว้ก่อนเด้ ว่าสูตรของอ้าย บ่คือผู้ได๋
เพราะเป็นสูตรคนอีสานโบราณ
แม่ใหญ่นวลเลาสอนให้อ้ายเฮ็ด
เดี๋ยว อ้ายสิเอามาบอกต่อกะแล้วกันเนาะ เผื่อว่าสิมีคนอยากลองเฮ็ดนำเบิ่ง
อ้ายสิพยายามบอกวิธีเฮ็ดให้มมันลละเอียดที่สุด ท่อที่สิเฮ็ดได้กะแล้วกัน
O k นะคะ เอื้อยแคท อิงลิช เลาถาม
ฟังคำว่า ok กะเลยคึดฮอดนิทานก้อมตอนเป็นเด็กน้อย
แม่ใหญ่นวลเลาไปย่ามลูกสาวที่กรุงเทพ
พอไปฮอด ลูกสาวเลากะมาฮับหน้าปากซอย
แม่ใหญ่นวลเลากะบ่ลืมกะตาหมากเลาเด้
เราได้ยินลูกสาวถามคนขับรถสองแถวว่า
“ถ้าเหมาไปในซอยคิดเท่าไหร่”
“สามสิบ ok ไหมครับ”
“อีสมๆ ok มันแปลว่าอีหยัง”เลาถามลูกสาว ตอนขึ้นมานั่งตอนท้ายรถสองแถวแล้ว
“ok แปลว่าตกลง แม้ อีแม่”ลูกสาวบอก
พอรถสองแถวแล่นไปได้จักหน่อย แม่ใหญ่นวลเราเฮ็ดกะต่าหมากหลุดมือตกลงไป
ย้อนเลาเสียดาย เลากะฟ้าวฮ้องบอกคนขับรถว่า
“ท้าวๆ จอดรถก่อนแน่ กะต่าหมากแม่ok”
555 อ้ายเว้าพื้นแม่ใหญ่นวลให้ฟังม่วนๆเนาะ บ่ต้องเอาไว้คึดหลายดอก
เว้ามาฮอดพี้แล้ว หลายๆคนก็คงสิอยากฮู้ว่าแม่ใหญ่นวลเลาเป็นผู้ได๋ แม่นบ่
แม่ใหญ่นวลเราเป็นอีแม่ของอ้ายเองแหละ
ในคืนเดือนหงาย หลังจากกินเข้าแลงแล้ว เฮามารวมกันนอนเล่นอยู่ตะแคร่ไม้ไผ่ใต้ต้นบักขาม
ที่ตั้งอยู่เดิ่นบ้าน บ่ต้องมีไฟแสงเดือนกะส่องสว่างป่านยาวกลางเว้น แม้
ลมก็พัดเย็นสบาย ยุงกะบ่มี
แม่ใหญ่นวลเลาเว้าเรื่องตอนที่เลายังเป็นสาวให้อ้ายฟังว่า
ตอนเลายังเป็นสาว เลาก็คือผู้จบผู้งามจนส่าไปสามบ้านเจ็ดบ้าน
(อ้ายฮู้แล้วว่าอ้ายเอานิสัยหลงตัวเองมาจากไผ๋)
บ้านเลา(ภายถึงแม่ใหญ่นวลเด้อ) มีนาหลายๆติดกับแม่น้ำมอ
เว้าง่ายๆกะคือรวยกะว่ามาโลด แม่ใหญ่นวลขี้คุยเอ้ย
เลาชื่อว่า นวลสา มีน้องสาวสองคน ชื่อว่า จันทร์เมือง กับ เสถียร
นอกจากมีที่นาหลายๆแล้ว ครอบครัวของแม่ใหญ่นวลยังมีงัวควายเลี้ยงเอาไว้จนเต็มคอก
ก่อนที่สิต้อนควายกลับไปเข้าคอก สาวนวลกับน้องสาวทั้งสองคน
กะสิแวะอาบน้ำที่แม่น้ำมอก่อนเป็นประจำคุมื้อ
แม่น้ำมอนี่เนาะกะสิมีพวกผู้บ่าวผู้สาวแวะมาอาบน้ำกัน กะประมาณว่าเป็นแหล่งพบปะสังสรรค์กัน
คันสิเปรียบกะคือสิเป็นผับเธคแถวอาซีเอคุมื้อนี้ล่ะ
อ้ายเปรียบเทียบเอาเองเด้ แม่ใหญ่นวลเลาบ่ได้บอกเอาไว้ดอก
ก่อนสิลงไปเล่นน้ำมอ สาวนวลกะเอาถ่านไฟฉายตรากบใส่วิทยุก่อน แล้วกะเปิดหมอลำตั้งเอาไว้ตรงฝั่ง
คุมื้อที่เพลงถ่านไฟฉายตรากบดังขึ้นและจบลง กะสิมื้อผู้บ่าวผู้หนึ่งโผล่หน้ามาตลอด
เลาชื่อว่า อ้ายชาย อ้ายชายนี้ถือได้ว่ารูปหล่อหลาย หุ่นสูงใหญ่เพราะว่าเพิ้นเป็นทหารพรานเด้
อ้ายชายนิมักสิถือฆ้องใส่ปลามานำตลอด เพิ้นวางของเอาไว้ใกล้วิทยุสาวนวล
แล้วกะลงมาเล่นน้ำมอ ก่อนสิค่อยๆขยับเข้ามาใกล้
“ผู้สาวขอยืมสบู่ถูแน่ได้บ่”อ้ายชายมุดน้ำขึ้นมาใกล้ๆสาวนวล
“บ่ให้แหลว อยากถูกะไปซื้อเอาเองโลด”ผู้สาวหันหน้าหนี
พยายามสิเอาสบู่นกแก้วใส่ลงไปในขัน แต่ว่าสบู่มันหมื่นแม้ มันกะหล่น จ๋อม ลงไปในน้ำมอ
อ้ายชายกะเลยเฮ็ดโตเป็นพระเอก มุดลงไปงมขึ้นมาให้
“เอาไปโลดข่อยยกให้”สาวนวลฟ้าวขึ้นมาจากน้ำมอ
“อีเมือง อีเถียน ขึ้นมาแม้ สิได้ต้อนควายกลับบ้านกลับเฮือน”ฮ้องเอิ้นน้องสาวแก้เขิน
“เดี๋ยวก่อน”อ้ายชายขึ้นมาจากน้ำ ล้วงไปในฆ้องกำเอาปลาข่อใหญ่ขึ้นมาโตหนึ่ง
ดึงเอาหญ้าขนมาฮ้อยเหงือกส่งให้สาวนวล
“แลกกับสบู่”เพิ้นบอกพร้อมฮอยยิ้มที่คึดว่าหล่อที่สุด สาวนวลกะฮับมาถือ
ขอขอบคุณรูปปลาข่อใหญ่งามๆจากเพจ แดนดินถิ่นมาตุภูมิ
ตอนแรกเห็นอ้ายชายมายืมสบู่ถูคุมื้อๆ กะชังๆ ผู้ชายอีหยัง หน้าด้านหน้าทนคัก มาได้คุมื้อ
จนมื้อนี้สาวนวลกับฮู้สึกว่า อ้ายชายกะเป็นพ่อชายที่ดีผู้หนึ่งคือกันเด้
(แม่ใหญ่นวลมักเขาแล้วแม่นบ่)เลาเล่าไป หน้าของแม่ใหญ่นวลแดงป่านว่าผู้สาวซ่ำน้อย
สรุปว่าปลาข่อใหญ่ตัวนั้น กะเลยกลายมาเป็น น้ำยาขนมเส้นในมื้อแลงนั่นเอง
หลังจากนั้นอ้ายชายกะเอามาปลามาฝากสาวนวลคุมื้อ
ลังเที่ยกะเป็นปลาดุก ปลาขาว ปลาสร้อย คันมื้อได๋ที่เพิ้นได้ปลาข่อใหญ่
เพิ้นจะสิฟ้าวเอามาให้ผู้สาวแทนที่สิเก็บเอาไว้กินเอง
เอ้า!!! มาเข้าเรื่องจักเที่ย สำหรับเมนูหมายเลข 14
อ้ายกะสิขอนำเสนอขนมเส้นน้ำยาปลาร้า สูตรแม่ใหญ่นวล
หรือคนกรุงเทพเพิ้นเอิ้นว่า ขนมจีนน้ำยาป่านั่นล่ะ
มาแนมเบิ่งโลดมามันสิเด็ดเผ็ดจนฮ้องไห้ขนาดได๋
มาเตรียมเครื่องก่อนเด้อ มาเบิ่งว่ามีอีหยังแน่ที่อ้ายที่เอาใส่ลงไป
กระชาย
กระเทียม
หัวผักบั่ว
หัวคิงไค
ขิง
ข่า
ใบบักกูด
บักพริกแห้งใหญ่
บักพริกแห้งน้อย
บักพริกดิบ ใส่สามอัน น้ำยาสิได้สีแดงงามๆปานเลือดพุ่นนะ
ส่วนเนื้อปลา มื้อนี้อ้ายใช้ปลานิล แต่ถ้าใช้ปลาข่อคือแม่ใหญ่นวล
เนื้อปลาสิฟูแซ่บกว่า
ปลาร้า
ปลาทูเค็ม
ลูกชิ้นปลา
กะปิ
เกลือ
น้ำปลา
น้ำตาล
ขาดบ่ได้เด้ ขนมเส้น ซื้อแบบเส้นน้อยๆ มันเข้าเส้นกว่า
บักบั่ว กับ ผักหอมเป เอาไว้โฮยหน้า
ส่วนผักเอาไว้กินน้ำกะมี
ผักก้านจอง
ผักบุ้งไทย
ผักกะหล่ำ
ผักอีตู่
โหระพา
ผักไผ่
สะระแหน่
บักถั่ว
บักแตง
สำคัญสุดโลด ถั่วงอก ขาดบ่ได้เด้
ไข่ไก่ ต้มแล้วกะปอกเปลือกเอาไว้กินคู่กัน
ย่างนำอ้ายเข้ามาในครัวโลดเดี๋ยวสิเอ็ดให้เบิ่งคุขั้นคุตอน
เอาผักทั้งหมดทั้งมวลไปแช่น้ำ ย่อนซื้อเขามาย่านเขาฉีดยากะเลยซื้อ
กระปุกนี้มาแช่ผักเอาไว้ 15 นาที
แล้วค่อยล้างออก 2 น้ำ
เอาบักพริกแห้งแช่น้ำไว้ก่อนเด้อ สิได้ตำง่ายๆ
แล้วกะปอกขิงเอาไว้ท่า
หลังจากนั่นกะเอา หัวผักบั่ว กระเทียม ขิง ข่า กะชาย หัวคิงไคทุบก่อนค่อยหั่น
ยกเว้นบักพริกแห้ง
ตั้งน้ำให้เดือด เอาเครื่องหอมทั้งหมดใส่ลงไปต้มฉีกใบบักกูดลงไปใส่เกลือนำเด้อ
พอเดือดอีกรอบ กะค่อยใส่กะปิ ท่าให้เดือดอีก
เอาปลานิลลงไปต้ม ต้มไปเรื่อยๆจนปลาสุกแล้วค่อยตักปลาขึ้น
แล้วจั่งเอาปลาทูเค็มลงไป อย่าเอาปลาทูเค็มลงไปต้มพร้อมปลานิลเด้อ
ปลาทูเค็มมันเปื่อยเร็ว เดี๋ยวมันสิเปื่อยหมดก่อน
ใส่ปลาทูเค็มลงไปแค่พอสุก กะตักขึ้นมา บ่ต้องต้มโดน
หลังจากนั้นกะตักเครื่องทั้งหมดขึ้นมา น้ำที่ใช้ต้มอย่าเททิ่มเด้ เฮาสิเอาไว้เฮ็ดน้ำหัวน้ำยา
(น้ำหัวกะคือน้ำหลักของน้ำยา)
เอาเครื่องหอมที่ต้มแล้ว ไปตำให้แหลก
พอตำแหลกแล้วกะเอาลงใส่ในน้ำหัว
คั้นให้ความหอมความเผ็ดออกมา คันน้ำมันน้อยกะคั้นหลายๆน้ำกะได้
พอได้น้ำหัวพอตามที่อยากได้แล้ว กะกรองเอากากมันออก เหลือไว้แต่น้ำล้วนๆ
ส่วนกากมันกะเอาทิ่ม
ต่อมากะเอาปลามาแกะเอาแต่เนื้อปลา แกะปลาทูแยกกันเอาไว้
ก่อนเอามาตำรวมกันให้แหลกจนเป็นเนื้อเดียวกัน คันสิให้ดีใช้สากคนวนๆไปรอบๆ เนื้อปลาสิได้ฟูขึ้นอีก
เอากระชายกับหัวบักบั่วที่บุแล้วหั่นเตรียมเอาไว้อีก
พร้อมทั้งต้นผักบั่วกับหอมเป กะเอามาหั่นไว้นำ
เอากระทะมาตั้งไฟ ใส่น้ำหัวที่เฮาเตรียมเอาไว้ใส่ลงไป
ต้มจนน้ำเดือด เอาเนื้อปลาที่ตำแล้วใส่ลงไป
หลังจากนั้น ให้ใส่น้ำปลาร้ากะเอาแล้วแต่ความมักของเฮา
ปรุงรสชาติใส่น้ำปลา น้ำตาล ชิมเบิ่งให้มันนัวๆเด้อ
คนให้มันเข้ากัน ท่าให้มันเดือดอีกจักเทื่อ ค่อยเอาลูกชิ้นปลาใส่ลงไป
แล้ว ปล่อยให้ลูกชิ้นปลาสุก กะเอากะชายกับหัวผักบั่วทุบใส่ลงไป
ต้มต่อไปอีกจักหน่อย ค่อยใส่ผักบั่วกับผักหอมเปหั่น ยกกระทะลงมาตักใส่ถ้วย
เป็นอันเรียบร้อย
พร้อมกิน
เดี๋ยวก่อน ขนมเส้นกะต้องกินกับผักเนาะ
เอาผักมาเตรียมก่อน
ผักบุ้งกับผักคันจอง เอามาหั่นแล้วเอาไปต้ม ต้มสุกกะตักขึ้นมาแช่น้ำ มันสิได้สีงามๆ
ส่วนผักกะหล่ำกะเอามาหั่นบางๆเป็นเส้นๆ
ผักอีตู่ โหระพา ผักไผ่ กับผักสะระแหน่ เอามาเด็ดใส่ถ้วยไว้
สำหรับ บักถั่วกับบักแตงกะเอามาหั่นเป็นต้อนน้อยๆ
ถั่งงอกกะเอาไปล้างก่อน
จัดทั้งหมดลงไปในกระด้งให้มันงามๆ มันจักสิน่าจับมาใส่ปาก
เอาไข่ต้มที่เฮาเตรียมไว้แต่แรก ออกมา
ทีนี่กะจับขนมเส้นใส่จานได้โลด
เมนูนี้ขนมเส้นน้ำยา สูตรแม่ใหญ่นวลกะเสร็จเรียบร้อยหมดทุกขบวนความแล้วน่อ
พออ้ายยกออกมา แม่ใหญ่นวลกับผู้ใหญ่ชายผัวเรากะถึงกลับกลืนน้ำลายลงคอเฮือกใหญ่ๆ
“คือเป็นตาแซ่บแท้ล่ะบักอ้าย”
แนวกินที่เฮ็ดขึ้นจากหัวใจ มันกะต้องแซ่บอยู่แล้วล่ะ โดยเฉพาะแนวกินที่เฮ็ดให้คนที่เฮาฮักและกะฮักเฮาที่สุดกิน
ไม่มีความคิดเห็น:
แสดงความคิดเห็น